Ekintzan banatutako oharra:
"Aurtengo Martxoak 8a ez dator ohikoan bezala, nazioarteko 70 herrialdetik gorako
emakumeekin* bat eginez, Euskal Herriko mugimendu feministak EMAKUMEOK
PLANTO aldarriarekin bat egingo dugu, zapaltzen gaituen sistema heteropatriarkar,
kapitalista eta arrazista salatzeko. Emakumeok* egunerokoan erasotzen gaituzten
indarkeriei eta bazterkeriari aurre egiteko mobilizazio eguna, mundua geratuko
duen greba feminista. Aldarrikapenak ohiko greba eredua gainditzeko helburua du,
lan merkatutik haratago, sistemaren biziraupenerako ezinbesteko diren lan guztiak
ikustarazi eta zaintza eta kontsumoari loturiko zapalkuntzak azpimarratuz. Gure bizi
eredua bera kolokan jarriko duen greba izango da.
Salaketa testuinguru horretan kokatzen da martxoak 8ko greba egunerako deituriko
kontsumo greba ere. Jakina baita, sistema kapitalista eta patriarkalak elkarrekintzan
dihardutela gure zapalkuntza iraunarazteko dimentsio anitzetan: gure gorputzen
merkantilizazioa eta kontrola, heteroarauaren agintepeko desira objektu bilakaraztea,
eredu estetiko zurrunen inposaketa, generoaren arabera diferentziaturiko kontsumo
ereduaren sustapena, publizitate sexistaren bidez ideologia patriarkalaren hedapena;
Kapitalaren metaketa prozesua areagotzeko ekoizpen masiboak eskatzen duen zaintza-
ekoizpen kate trasnazional amaigabeetan eta baldintza jasanezinetan gure gorputzen
esplotazio masiboa,... Hau gutxi ez eta, azkenaldian merkatu sistema harrapakari
honen isla diren marka handiek “feminismoa” haien beste produktu bat bailitzan
saltzea bilatu dute, zapalkuntza sistema orok darabilen estrategiaetako bat baita,
berau kolokan jartzen dituzten aldarriak bereganatuz desaktibatzen saiatzea.
Guzti hori salatzera dator gaurko ekintza, eta horren ikur diren multinazional,
denda-kate, banketxe eta abarretara gure salaketa helaraztera. Aldi berean, sistema
neoliberal, kolonial eta heteropatriarkarraren baitako egungo kontsumo eredua guzti
hau eta gehiago sostengatzeko gakoetako bat izanik, martxoak 8an kontsumitzeari
uko egiteko deialdia luzatzen dugu.
Kontsumitzen gaituen kontsumo ereduari egin diezaigoun planto!
Kateatzen gaituzten zaintza-ekoizpen kateak apur ditzagun!
Indar kolektiboaz gera dezagun sistema!
MARTXOAK 8 EMAKUMEOK* PLANTO!"